السلام عليكم ورحمة الله وبركاته
حاسس ان اللي بيشوف العنوان من برا هيفتكر ان الموضوع عن توابع مباراة مصر والجزائر .. هي صحيح فتنة , بس انا هتكلم عن فتنة تانية
هتكلم عن دور شباب كتير تسبب في هدم حياة بنات كتير .. والموضوع مدرج معاه تحت في المشاركات آراء ومواقف كتير حصلت بيحكوها البنات
وأتمنى إن الكل يقراها
ـــــــــــــــــــــــــــــ
بلد زي مصر.. فيها 9 مليون بنت متأخر زواجها غير الملايين في البلاد التانية
معقولة الملايين دي اتاخر زواجهم لأنهم ناس طماعين وعايزين مهر وفلوس ومظاهر .. وكل الشباب فقرا مش لاقيين ياكلوا ؟
ولا لأن النسبة بين عدد الشباب وعدد البنات مش متكافئة ؟؟
ماهم زي النمل اهم في كل حتة
وحتى لو كانت اقل شوية ... هتبقى لدرجة ان يكون في الوطن العربي ملايين البنات بدون زواج ؟!
ملايين ؟؟!!
الكارثة المجتمعية دي مش البنات بس السبب فيها لأنها متعلقة بالشباب كمان ...
وفي أسباب المجتمع مطنشها .. الكل ماسك في سبب غلاء المهور وسايب موضوع تاني وفي نظري هو الأهم .. وهو ان في .....
مشكلة في رجالة الأيام دي
المشكلة مش مشكلة اقتصادية بس .. المشكلة مشكلة فكر خاطئ معشش في دماغ الشبان واهاليهم .. فكرهم ده هو اللي زود تأزم ظاهرة تأخر الزواج
بنات كتير جدا يقولوا احنا ما بنرهقش العريس بالطلبات .. وفي بنات كتير مستعدين يتجوزوا بدون اي طلبات لو الشاب يستاهل
طب فين المشكلة ؟؟
المشكلة ان الشاب بييجي وبيقعد وبيقول انا قدرتي كزا وكزا
يعني تقدر تدفع المبلغ الفلاني لو ما تقدرش قول ما تتكسفش
يعمل نفسه ابو العريف ويقول ايوة اقدر
نيجي بقى ساعة الجد ...
(انا ظروفي صعبة .. ارحمونا .. ايه كل الطلبات دي ..)
للأسف في شباب لما يلاقي ناس هدفهم ييسروا جواز بنتهم
وبنت بتتكسف تطلب بيبقى عايزها تكمل جميلها وتقوله خدني ببلاش ..
طب مش انت راجل عند كلمتك ؟؟ ليه ما قلتش انا ما اقدرش ادفع ولا مليم يوم ما اتفقت مع اهلها ؟؟؟
تقول ايوة وتتفق بالتراضي ان مقدم الصداق في عقد الزواج هيكون كزا كزا وبعد كده تتهرب وتقول ماعنديش ..!
والحكاية مش حكاية انه ما عندوش .. حكاية انه مستخسر يدفع
ولما يلاقي ناس متساهلين معاه يقولك ما استغلهم للآخر واطلع انا الكسبان
بقى في شباب كتير يبرر بخله وأنانيته بكلمة ظروفي صعبة
ـــــــــــــــــــــــــــــ
انا بتمنى اكمل دكتوراه
(ايوة طبعا من حقك تكملي لازم تأدي رسالتك في المجتمع انا بحب العلم والمتعلمين وان شاء الله هفكر اني اكمل انا كمان)
طب الحمدلله
نيجي وقت الجد
(انتي هتعملي فيها ارسطو ؟؟ ما هي الدنيا مليانة حملة دكتوراه !... وهتسيبي بيتك وجوزك لمين يا هانم .....)
مش احنا اتفقنا من الاول ؟
(لا الظرف اتغير)
ظرف ايه بس اللي اتغير قولوا انكم مش قد كلمتكم وبقى عادي جدا ان الراجل يخلف بوعده .. وايه يعني ....
بعد شوية اتنازلي عن الفرح ..
(انتي فاكرة ان عندك 20 سنة تعملي فرح وتلبسي فستان!)
يعني باختصار المطلوب في النهاية عشان البنت اللي اتأخر جوازها تتجوز يتكتب كتابها وتروح معاه مفيش في ايدها غير شنطة فيها بيجامتين وبلوزتين ومشط ...على اي بيت هو يختاره وخلاص.. وتكمل جميلها بقى وتخلي اهلها هم اللي يدفعوا اجرة المأذون بالمرة
طب اي بنت في الحالة دي هتعمل ايه؟؟ اكيد الرفض و مش عشان الماديات
الرفض بيبقى لأن اللي بيعمل كده لا يمكن يكون راجل محترم
ولا يمكن تقدر ترتبط بيه وتكمل معاه حياتها ويكون ابو اولادها
ولما تيجي الناس تسأله ليه انفصلت عن خطيبتك ؟
(اصل دول ناس طلباتهم كتير ... ناس ما بترحمش )
ـــــــــــــــــــــــــــــ
مشكلة تانية في فكر الشباب
شاب ظروفه على قده .. وعايز يتجوز ...
(عايزها ملكة جمال ..وما تزيدش عن 22 او 24 سنة .. متدينة .. متعلمة .. واهلها ناس محترمين ... دمها خفيف ... صوتها زي الكروان
الوزن من 55 لـ65 كيلو ... كيلو واحد زيادة مش عايز
الطول من 163 لـ 167 .. سنتي واحد زيادة مش عايز
لون عنيها اخضر مائل للزرقة ... مائل للبني مش عايز )
والله العظيم بنسمع عن طلبات الواحد مش عارف يضحك ولا يعيط عليها
يا اخي مش انت حالتك على قدك ؟؟ وتيجي عايز تتجوز وحدة بالمواصفات دي ومش عايزها تتشرط هي واهلها عليك ؟؟
طب بما انك شاب عندك 29 او 30 اتجوز بنت من سنك .. واغلب البنات اللي اتاخر زواجهم كل اللي عايزينه راجل محترم ومش هتتشرط كتير عشان جوازتها تتم
( لا طبعا ما اتجوزش وحدة عندها 29 او 30 .. دي خلاص عجزت ... )
بيبقى عنده في فكره ان الزوجة لزماً وحتماً وبدون نقاش أو مفاوضات لابد تكون أصغر منه بخمس سنين على الأقل
هي جزمة هتشتريها لازم مقاس معين ؟!
ليه بقيتوا تحطوا السن والشكل هي المقاييس الأساسية لأختيار الزوجة الصالحة ؟
وبعد كده تقعدوا تشتكوا منها ومن عمايلها
ليه ما بتاخدوش رسول الله قدوة ليكم ... لو في ايامينا شاب عنده 25 سنة وفقير زي ما كان رسول الله
وقالوله اتجوز (سيدة مش آنسة) فاضلة ومحترمة وسمعتها زي الفل وعندها 40 سنة ... تفتكروا يقبل؟؟؟
( وانا ليه اعمل في نفسي كده ؟!!! منا شاب زي الفل)
بس احنا ما بنقولش لشاب عنده 25 يتجوز سيدة عندها 40 زي ما حصل مع الرسول , احنا بنقول لو الشاب عنده 27 والبنت عندها 30 مثلا ...
" ده اذا قدر حد يتخطى حدوده و يعرض عليه عرض زي كده ... "
(انت اتجننت ؟! دي اكبر مني !)
وايه يعني اكبر منك هي هتاكلك ؟!
اغلب الشباب اول ما يعرف ان البنت الفلانية اكبر منه بسنة ولا اتنين بيشيلها من دماغه خلاص ويعتبرها في مقام عمته !
ـــــــــــــــــــــــــــــ
دور أمهات العرسان في زيادة الأزمة
لو شاب في منتصف التلاتينات ... والدته عرفت ان البنت اللي عايز يخطبها عدت التلاتين بشوية .. تقلب الدنيا وما تقعدهاش ..
وتعمل اجتماع طارئ للعيلة وتنور اللمبة الحمرا
عشان يقنعوه يتراجع عن القرار الكارثي اللي عايز يتخذه
(بنت فوق التلاتين ؟! انت مش عايز تخلف ؟!)
وبيحاولوا يميلوا دماغه .. وكأنه قالهم عايز اتجوز معزة
( هجيبلك وحدة أصغر وشغالة بنظام ديجيتال للخلفة .. تضغط على الريموت كونترول تحمل .. تدوس على زر اكزت تولد و كل الناس تحسدك عليها ... )
وطبعا في شباب ماعندهمش شخصية وكلام امه الظالم هو اللي بيمشي عليه .. وبحجة ايه ؟
( مش عايز اغضبها ..)
يعني انت بار بوالدتك في كل حاجة ومش ناقص غير دي .. طب ماهو قرار والدتك ده ظالم وغضبها في الحالة دي لا يجوز ما دامت البنت كويسة وما تتعيبش والسبب بس السن ده شيئ ما يرضيش ربنا ..!
( لا انا خايف تغضب عليه وبالتالي ربنا يغضب عليه كمان ... اصل انا بحب اسمع كلام ربنا اوي )ـــــــــــــــــــــــــــــ
لو ارتبط الشاب ببنت فيها المواصفات اللي عايزها وحصل معاها مشاكل يفضل متنح مش عايز يسيبها ... طب اذا هي بنت متعبة سيبها والبنات كتير ودور على وحدة صاحبة دين واخلاق ...
( لا خلاص .. دي دخلت دماغي ..)
وبعد الجواز تيجي المشاكل اللي توصل للطلاق والمحاكم
و يعيش تعيس ... وبنات كتير زي الجواهر قاعدين في بيوت اهاليهم محدش مقدرهم ولا معبرهم
بسبب الطريقة الغريبة اللي بيختار بيها شبابنا
وانا ما بتكلمش عن حالات شاذة او قليلة
نسبة كبيرة لا يستهان بيها من الشباب عندنا بيفكروا بالشكل ده
شباب بقوا يفكروا بالطريقة دي طبيعي جدا تظهر مشكلة تأخر الزواج في المجتمع اللي هما فيه
تعالوا اسألوا اغلب البنات اللي اتأخر زواجهم أغلبهم بنات على مستوى عالي من الاخلاق والتربية والشهادة والجمال كمان
كل وحدة فيهم اتخطبت قبل كده اقل حاجة مرة
وفي اتنين
وفي تلاتة واربعة
يبقى مين السبب ان كل البنات دي ما استمرتش في خطوبتها؟؟
مش لأن الشاب اللي وافقت عليه وخطبها خذلها؟
وما بنقولش خذلها يعني قصدنا فلوس زي ما الناس دايما بتقول
للأسف بيكون خذلها برجولته واخلاقه
لو الشباب اتغير وصحح تفكيره وسلوكه .. الظاهرة دي هتنتهي
واللي هيقول لا في ناس بتحب المظاهر وما بتتنازلش
اقوله وهم الشباب ليه يروحوا للناس دي ويمسكوا فيهم ؟؟؟
أصل رموش بنتهم مقوسة 180 درجة .. مش قادر يقاوم .. ويخطبها ويبدأ يدور على عقد عمل في بلاد واق الواق مدته 250 سنة عشان يحوش المهر ...
يبقى المشكلة في البنات بس ؟؟ .. وفي الأخر يقولوا على البنت اللي اتأخر زواجها عانس وبايرة ... طب والشباب اللي من النوعية اللي ذكرناها دي واللي بيساهم هو واهله في تفاقم المشكلة ... مايعتبرش باير ؟؟
افهموا بقى !!!
ـــــــــــــــــــــــــــــ
قال رسول الله صلى الله عليه وسلم :
( إنما النساء شقائق الرجال ، ما أكرمهن إلا كريم ، وما أهانهن إلا لئيم )
( أكمل المؤمنين إيماناً أحسنهم خلقاً ، وخياركم خياركم لنسائهم )
( الدنيا متاع وخير متاعها المرأة الصالحة )
وقال صلى الله عليه وسلم في وصيته وقبل وفاته وظل يرددها :
( أيها الناس ، اتقوا الله في النساء ، اتقوا الله في النساء ، اوصيكم بالنساء خيراً )
صدق رسول الله صلى الله عليه وسلم
رسول الله بيقول ( يا أيها الناس ) .. يعني الكلام مش موجه للرجال بس .. شايفين يا أمهات العرسان ؟ لكل الناس , يعني ليكي انتي كمان
اتقي الله في بنات الناس .. وما تقفيش في طريق زواج البنت من ابنك عشان عمرها ولا شكلها مش عاجبك
شايفين يا شباب ياللي بترفضوا البنت وبتهينوها عشان ربنا ابتلاها بتأخر زواجها وما بترضوش تتجوزوها وكأنها مصابة بمرض معدي .. ياريت لما تتكبروا على بنت بسبب سنها ولا تفاصيل هايفة في شكلها تفتكروا كلام الرسول صلى الله عليه وسلم
ملحوظة : المواقف المذكورة حصلت فعلا على أرض الواقع لبنات كتير جدا ولم تكتب من فراغ
ألا يستحق الموضوع من هؤلاء الشباب الهادم لحياته وحياة فتايات كثيرات إعادة النظر في تفكيره
ألا يستحق من الأمهات إعادة النظر في التعامل مع فتايات ملسمات مبتليات بكرب شديد يطلبن العفة والأمومة ؟لتأتي هي وتساهم بكل قوتها في زيادة شدتها ؟؟ ألا يستحق أن تربي الأمهات أبنائهم على الطريقة السليمة في اختيار شريكة الحياة ؟وفي نظرة الشاب إلى الفتاة على أنها بشر وليست آلة لاسعاده و للإنجاب فقط
أيحسب هؤلاء أنهم لن يسألوا عن أفعالهم هذه يوم القيامة ؟
